王祖藍呢日現身佢主演嘅電影慈善觀映禮，呢套戲以漸凍人做題材，不過當年撞上疫情而冇正式喺戲院上映，令祖藍覺得好遺憾。祖藍就話，12年前興起嘅冰桶挑戰係引起大眾關注漸凍症嘅潮流活動，宜家好多關注漸凍症嘅協會都係喺冰桶挑戰後先出現，呢次搞慈善觀映活動都係想幫助協會同病友。呢套戲更有真正漸凍人演出，就係去年離世嘅演員吳博君。
祖藍工作範疇多，佢透露最近忙於做一套兒童音樂劇，呢套劇仲係以2個囡囡做靈感，囡囡們雖然冇份主演，但都有過鏡客串幾個鏡頭。祖藍向佢哋解釋，其他小朋友都專業背好對白又唱又跳，所以呢次只可以俾幾個鏡頭佢哋，但下季好快就拍，已經叫佢哋背定劇本。祖藍仲話，拍兒童嘢比拍大人嘢輕鬆，因為小朋友只會認為一切係玩。而劇集喺全國不同衛視播出，亦同TVB傾談中，可能有機會喺香港同大家見面。
