黃宗澤(Bosco)、陳瀅、吳業坤及胡鴻鈞(Hubert)於20號去到泰國芭堤雅出席粉絲見面會，吸引到逾三千多人到場。見面會上Bosco同大家分享佢嘅保養心得，而陳瀅、坤哥同Hubert則為大家獻唱，而適逢呢日係520情人節，陳瀅就同Bosco齊齊擺出心心手勢，祝大家情人節快樂。
Bosco笑言今次係寓工作於娛樂，難得嚟到泰國芭堤雅，當然要順便游水同曬太陽，提到520呢日要開工，Bosco就話呢日對藝人嚟講冇咩特別感覺，仲話日日有工開、人人有工開就最好，佢笑言：「最緊要係620(邵氏高層樂易玲)畀到工我地開，哈哈....跟住都會馬不停蹄飛去第二度繼續工作，我有工開就開心，今次有工開之餘仲有得旅行游水陽光海灘，就更加開心！」
陳瀅指可以喺520呢日同三位型男一齊開工，加上繼上月開騷後又可以再次唱歌表演，所以相當開心，佢又指呢次行程都有抽時間畀自己享受下泰國嘅美食同文化。
而早一日嚟到泰國嘅坤哥，就先行到曼谷拜神及還神，而當佢去到芭堤雅後，坤哥因為日日游水而曬黑咗。坤哥話對上一次嚟到泰國已經係疫情前，所以佢話今次係工作之餘又有娛樂，仲話希望以後公司可以安排多啲呢類工作，至於問到520有冇送花因太太？坤哥就話返香港後會補祝。
首次嚟到芭堤雅嘅Hubert，對入住嘅酒店房讚不絕口，因為一行出露台就可以游水：「雖然天氣真係好熱，但有嗰種陽光與海灘度假嘅感覺，真係唔似嚟工作，似成班同事一齊去團建咁，而且又可以同大家一齊共渡一個值得甜蜜浪漫嘅節日。」
